اسلام آباد۔17جنوری(اے پی پی) وفاقی وزیر تخفیف غربت و سماجی بہبود شازیہ مری آکھیے جو تنقید کرݨ ساریں توں سوکھا کم اے مگر اساکوں آپݨے پاکستانی بھیݨ بھراویں بارے سوچݨا چاہیدے، اساکوں اتھائیں مرݨا تے جیوݨا اے ، اساکوں ھک ݙوجھے دی سپورٹ کرݨی چاہیدی اے ، اساں بھڄے سے تے نہ بھجسوں ، اساں دنیا دے سامݨے پاکستان دا مقدمہ وݙے احسن انداز اچ پیش کیتے تے سیلاب متاثرین کیتے امداد ڳھدی اے ۔ قومی اسمبلی اچ غوث بخش مہر دی طرفوں چاتے ڳئے اعتراض دے نکتےدا جواب ݙیندے ہوئیں شازیہ مری آکھیے میں جݙاں توں وزیر بݨی ہاں اتھاں باقاعدگی نال آوݨ تے فخر محسوس کریندی ہاں ۔ انہاں آکھیے وزرا کوں ٹارگٹ تاں بݨایا ویندے مگر ارکان کوں وی ایوان اچ آپدی موجودگی یقینی بݨاوݨی چاہیدی اے ، ارکان دے گوشوارے جمع نہ تھیوݨ دی وجہ توں اتھاں نی آسڳدے ، اے مسئلہ حل تھیوݨ تے ارکان دی تعداد ودھ ویسی ۔ انہاں آکھیے سندھ دے سیلاب زدگان دا مسئلہ درست اے، پورے ملک دے 33 ملین لوک سیلاب توں متاثر تھئن ۔ بے نظیر انکم سپورٹ پروگرام دے ذریعے متاثرین اچ 70 ارب روپے ݙتن ۔ حکومت توں جیڑھا کجھ وی تھئے او کیتا ڳئے اساں کہیں بندے کوں خوش کرݨ کیتے اے نی کریندے پئے اساکوں اللہ دی خوشنودی عزیز اے۔ انہاں آکھیے اساں سیلاب دی تباہ کاریاں دے حوالے نال پوری دنیا کوں جگائے تے امداد وی ڳھدی اے ۔ انہاں آکھیے میݙا آپݨا تعلق سندھ توں اے تے میݙے بزرگاں دیاں قبراں وی ٻڈ ڳئن ، تنقید کرݨ سوکھا کم اے مگر اساکوں آپݨے پاکستانی بھیݨ بھراویں کیتے سوچݨا ہوسی ۔ ایندے توں پہلے جی ڈی اے دے رکن غوث بخش مہر آکھیے سیلاب دے بعد کاشتکاراں کوں جنوری تئیں امداد ݙیوݨ دا وعدہ کیتا ڳیا ہئی مگر سندھ اچ حالی تئیں کہیں کوں کوئی رقم نی ملی اساں ایوان اچ ڳالھ کریندوں مگر اتھاں کوئی سݨݨ آلا کائنی ۔ وزرا اساکوں ملݨ کیتے وقت نی ݙیندے ۔
