پشاور۔7مئی (اے پی پی):وزیراعظم محمدشہبازشریف آکھیے جو سارے صوبیں دی ھکو سویں ترقی تے یقین رکھیندوں ،حقیقی پاکستان اچ سارے لوکاں کوں ھکو سویں موقع ݙیسوں۔وزیراعظم شہباز شریف آکھیے جو جݙاں تئیں خادم پاکستان رہیا تاں عوام نال کوڑے وعدے نہ کریساں ۔ کݙاں تئیں کشکول گھن تے خریت منڳوں ، اساکوں محنت کرتے آپݨے پیراں تے کھڑا تھیوݨا ہوسی جے کلھا پنجاب ترقی کریندے تاں اے پاکستان دی ترقی کائنی ۔شانگلہ اچ پاکستان مسلم لیگ ن دے سیاسی پاور شو توں خطاب کریندے ہوئیں وزیراعظم آکھیے جو فیصلہ کیتا ہئی جو پہلے شانگلہ ویساں ، خیبرپختونخوا دے غیورلوکاں کوں سلام پیش کرینداں ،صوبے دی تاریخ قربانیاں توں بھری پئی اے ، خیبرپختونخوا اچ میݙے قائد نوازشریف دے شیر رہندن ، اتھاں دے لوکاں وݙیاں قربانیاں ݙتن ۔ خادم پاکستان دا عہدہ سنبھالیے ترائے ہفتے تھئن ، انہاں آکھیے جو صوبے اچ پچھلے8سال پی ٹی آئی دی حکومت اے، انہاں کتنے ہسپتال بݨائے اتے کتنے ہسپتالاں اچ مفت دوائیں ݙتن ،خیبرپختونخوا کوں ھک عظیم صوبہ بݨا تے دم گھنسوں جݙاں تئیں اللہ خادم پاکستان بݨئی رکھیا تاں کوڑے وعدے نہ کریاں ، غلطی تھیسی تاں تساکوں گواہ بݨا تے معافی منڳسوں ، جے تئیں جان اے ݙینھ رات کم کریساٻں ۔ پنجاب دے ہراسپتال اچ غریباں دا مفت علاج تھیندا ہئی ، پنجاب اچ ول ہسپتالاں اچ مفت علاج شروع کرا ݙتے۔وزیراعظم آکھیے جو غریب علاج کیتے سسک تے جان ݙے ݙیندے جے اللہ موقع ݙتا تاں پورے خیبرپختونخوا اچ مفت علاج دی سہولت ہوسی، 4 سالاں اچ مہانگ عروج تے پڄ ڳئی ، سابق حکومت تاریخ دے ساریں وں وݙے قرضے ڳھدے، پی ٹی آئی حکومت 24ہزارارب قرض ڳھدا کوئی نویں سلھ نی لاتی ، پشاوربی آرٹی چلدی تے سڑدی رہی ۔وزیراعظم شہباز شریف آکھیے جو ساݙی حکومت 11،11 مہینے اچ میٹروبساں چلائیاں ، جان لڑاݙیساں خیبرپختونخوا دے مسئلے حل کرتے ݙکھیساں ، اٹا، کھنڈ غریب گھراݨے دی پہنچ توں ٻہر تھی ڳئے ، رمضان بازار، یوٹیلیٹی سٹورز اچ اٹا ، کھنڈ کوں سستا کرائے ، پشاور بی آرٹی اچ ارباں دی کرپشن تھئی ۔ خیبرپختونخوا دے وزیراعلیٰ وی پنجاب وانڳوں سستا اٹا ݙیوݨ دا اعلان کرن ،جے خیبرپختونخوا دا وزیراعلیٰ سستا اٹا نہ ݙیسی تاں اساں ݙیسوں ، پچھلے 4 سالاں اچ قرضے گھن تے ملک دا بھٹا ٻہہ ڳئے ۔ اساں پورے پاکستان دی ھکو سویں ترقی چاہندوں ۔ شانگلہ ول جلدی آساں اتھاں میڈیکل کالج بݨیسوں ۔ݙینھ رات کم کریسوں ،عوام سم پوسی میں جاگساں ، پورن اچ گرڈ اسٹیشن کوں ترائے مہینے اچ بݨاوݨ دی پوری کوشش کریساں ۔پاکستان دے غریب ٻال اڄ وی سکول نی ونڄ سڳدے ، غریباں دے والدین دوائی نہ ملݨ تے مر ویندن اساکوں محنت کرتے آپݨے پیراں تے کھرا تھیوݨا ہوی ، رووݨ پٹݨ نال کجھ نہ تھیسی ، ایں ویلھے خزانہ خالی اتے قرضے ہی قرضے ہن، سعودی عرب دا دورہ کر تے آیاں سعودی شہزادے، یواے ای آکھیے جو پاکستان دی ہرممکن مدد کریسوں ، سعودی عرب، یواے ای پاکستان نال محبت کریندن ، سعودی عرب ہر اوکھے ویلھے پاکستان دا ساتھ ݙتے ۔
.jpg)
.jpg)
