اسلام آباد۔7فروری(اے پی پی):بین الپارلیمانی یونین (آئی پی یو) دے صدر دوراتے پچیکو منڳل کوں قومی اسمبلی دے سپیکر راجہ پرویز اشرف نال ملاقات کیتی جیں دوران ݙوہیں رہنماواں خطے اچ امن و استحکام دے ودھارے اچ پارلیمانی سفارت کاری دے نال نال بین الپارلیمانی تعاون کوں تکڑا بݨاوݨ دی اہمیت تے ڳالھ مہاڑ کیتی ۔ قومی اسمبلی سیکرٹریٹ توں جاری بیان موجب ملاقات اچ سپیکرایں ڳالھ تے زور ݙتا جو ماحولیاتی تبدیلی، دہشت گردی اتے بین الاقوامی جرائم جییے چیلنجز نال نبݨݨ کیتے بین الپارلیمانی تعاون انتہائی اہم اے۔ انہاں انہاں اوکھے تے باہم جڑیے ہوئے مسئلیں دا حل ڳولݨ کیتے پارلیمینٹیرینز کوں سرحداں تے سیاسی تقسیم توں بالاتر تھی تے رل تے کم کرݨ دی لوڑھ تے زور ڈتے۔سپیکر آئی پی یو دے صدر کیتے خیر سگالی دے جذبات دا اظہار کریندے ہوئیں آکھیے او قومی اسمبلی اتے آئی پی یو دے ٻئے ممبر ملکاں دے درمیان مسلسل رابطیں کوں یقینی بݨاوݨ کیتے اہم کردار ادا کریندے پئن ۔ انہاں آکھیے جمہوریت، امن، انسانی حقوق اتے پائیدار ترقی تے عالمی مذاکرات اتے عمل اچ پارلیمنٹ کلیدی کردار دی حامل اے۔ آئی پی یو دے صدر سپیکر دی طرفوں خیر سگالی دے جذبات دے اظہار تے شکریہ ادا کیتے۔ انہاں پشاور اچ دہشت گردی دے اڄوکے واقعے تے وی ݙکھ تے افسوس اتے متاثرین دے خاندان نال ہمدردی دا اظہار کیتے۔
.jpg)
.jpg)
