اسلام آباد ۔ 09 اگست (اے پی پی) دفتر خارجہ دے ترجمان ڈاکٹر محمد فیصل آکھے جو بھارت ولوں آرٹیکل اے۔35 دی منسوخی کشمیریاں کوں مستقل رہائشی حق توں محروم اتے اقلیت اچ تبدیل کرنڑ دی کوشش ہے ، بھارت ریاستی جبر لکاونڑ سانگے صحافیاں کوں کشمیر ونجنڑ دی اجازت وی کائنی ڈیندا پیا۔ پاکستان پرامن ہمسائیگی اُتے یقین رکھیندے ، افغانستان سیمت سارے مسلیاں دے پرامن حل کیتے آپ دا کر دار ادا کریندے راہسوں ، اقوام متحدہ اچ پاکستان دی مستقل مندوب ڈاکٹر ملیحہ لودھی تحریک انصاف دے سربراہ عمران خان نال ذاتی حیثیت اچ ملاقات کیتی، دفتر خارجہ کو ں ایں گالھ دا علم کائنا ہئی جو سارے نان کیریئر ڈپلومیٹس آپ دے کنٹریکٹ دے مطابق مستعفی سمجھے ویسن اوں ویلے تئیں جو نویں حکومت انہاں کوں کم جاری رکھنڑ دی ہدایت نہ کرے ۔ خمیس کوں آپ دی ہفتہ وار پریس بریفنگ دے دوران ڈاکٹر فیصل اے گالہیں آکھیاں۔ ترجمان ڈسایا جو گزریل ہفتے بھارتی سکیورٹی فورسز 12 کشمیریاں کوںشہید کیتے، بھارت ولوں کنٹرول لائن اُتے بلااشتعال فائرنگ دا سلسلہ جاری ہے جیہڑا جو جنگ بندی دے معاہدے دی خلاف ورزی ہے ۔ ترجمان آکھیا جو اقوام متحدہ دے فوجی مبصرین کو ں کم کائنی کرنڑ ڈتا ویندا پیا اتے بھارت ریاستی جبر کوں لکاونڑ سانگے صحافیاں کوں کشمیر اچ ونجنڑ دی اجازت وی کائنی دیندا پیا۔ ہک سوال دے جواب اچ ترجمان آکھیا جو گلگت بلتستان اچ سکولاں کوں ساڑنڑ دی تحقیقات تھیندی پئی ہے اتے جوں ہی حتمی رپورٹ امسی میڈیا کوں ایں بارے ڈسایا ویسی ۔
.jpg)
